A EASD ANTONIO FAÍLDE CELEBROU UNHA MESA REDONDA CON MOTIVO DO FALLO DOS PREMIOS MESTRE

A interdisciplinariedade no mundo do deseño

Os recoñecidos deseñadores galegos Pepe Barro, Sara Coleman e Arturo Álvarez achegaron o seu punto de vista e as súas experiencias persoais acerca da interdisciplinariedade.

A interdisciplinariedade no mundo do deseño
Na mesa redonda conversando cos asistentes
Na mesa redonda conversando cos asistentes

Aproveitando a presenza na EASD Antonio Faílde destes prestixiosos profesionais galegos do deseño,como xurado dos Premios Josep Albert Mestre organizados pola Confederación de Escuelas de Artes Plásticas y Diseño e que se entregarán o vindeiro 4 de maio en Ourense, organizouse unha mesa redonda arredor do concepto da interdisciplinariedade.

Abriu a sesión Sara Coleman falando de como os seus conceptos de esculturas textiles e prendas de vestir escultóricas existen grazas a complementariedade dos seus coñecementos cos de outros artesáns que lle axudan no proceso, así coma artistas, patronistas, tecedores ou deseñadores 3D, entre outros.

A continuación Pepe Barro, explicou a través do caso da Casa Museo de Rosalía de Castro, do que foi responsable de museoloxía e museografía, como un proxecto desta índole sería imposible levalo adiante sen una mirada interdisciplinar. Expertos en arquitectura ou musicoloxía, creadores de audiovisuais ou actores de dobraxe foron algúns dos perfís necesarios para crear a idea que Pepe Barro tiña en mente.

Arturo Álvarez aportou a idea do problema como oportunidade, a través de varias experiencias propias, e en palabras súas: " Si o problema é gordo, é unha oportunidade da ostia!"

E para rematar a xornada, conversación cos asistentes con temas tan interesantes e que darían para moitas máis xornadas deste tipo como a interdisciplinariedade na educación, diferencias entre colaboración ou encargo, os inconventientes da cooperación ou a dúbida como lugar de reflexión.

Os relatores (Información extraída da páxina web da EASD)

Pepe Barro ( Pontedeume, 1955 ) exerce a profesión desde 1972. En 1977 toma conta do proxecto gráfico de A Nosa Terra, alén de outros proxectos para editoriais, grupos de teatro, revistas, etc… En 1985 co-funda o Grupo Revisión Deseño, desde o que elabora numerosos proxectos no ámbito da identidade e comunicación visual, que forman parte xa da historia do deseño gráfico galego e estatal, tal e como recoñeceu a referencial Historia del Diseño Gráfico de Enric Satué. Algúns dos seus traballos mais coñecidos son os primeiros “cuponazos” da Once, a camiseta da Selección Galega de Fútbol, a web da Real Academia Galega, a renovación da Casa de Rosalía de Castro.En 2000 o Museo Reina Sofía, elixiu o de Turgalicia coma un dos cen signos do século XX. Recentemente ten deseñado montaxes de exposicións como a de deseño de moda galega no CGAC “Con-Fío en Galicia” ou a itinerante “Saúde e Terra Irmá(n)s” sobre as Irmandades da Fala Ten recibido numerosos premios como o da Crítica Galega e formado parte de xurados como o dos Premios de Deseño Galicia, Signes, Laus, AEPD, etc… Pepe Barro é autor de numerosos ensaios sobre o Deseño, recentemente compilados no libro O cómo é o que conta.

Sara Coleman ( A Coruña, 1980) Artista e deseñadora de formación híbrida, Sara Coleman é unha creadora inquieta que se enfronta constantemente a novos interrogantes. Recentemente foi galardoada co Primeiro Premio ArtsFAD 2017 e é colaboradora e profesora no Máster en Moda, Arte, Cultura e Sociedade da Universidade da Coruña. No ano 2007 funda a súa propia marca de moda: SARA COLEMAN_Organic Design, presentando as súas coleccións de moda na pasarela Mercedes Benz Fashion Week Madrid e en feiras internacionais do sector téxtil, actividade que veu compaxinado coa docencia en distintas escolas e institucións. Ao longo da súa carreira profesional traballou como deseñadora e patronista para diversas empresas do sector téxtil, ao mesmo tempo que realizou colaboracións como deseñadora de vestiario para Artes Escénicas e como estilista en diferentes producións de moda e montaxes expositivas. No seu continuo interese polos procesos, a creación e a investigación artística realizou diferentes talleres. En paralelo a estas actividades, e consciente do seu propio interese en desenvolver un traballo máis persoal, Sara Coleman atópase actualmente en pleno proceso de investigación e experimentación no ámbito artístico.

Arturo Álvarez ( Pontevedra, 1964) é un consolidado creador recoñecido con importantes premios tanto dentro como fóra de España, polas súas achegas conceptuais ao mundo da iluminación de deseño. As súas creacións encontrámolas en Gran Bretaña, Francia, Estados Unidos, Australia, etc…. Desenvolve desde o principio un estilo propio e recoñecible de forte personalidade. Manexa con soltura formas, volumes e fontes de luz dunha forma sinxela e elegante, mesturándoos con mestría e achegando unha nova visión da iluminación creativa, chegando a concibir nos espazos montaxes lumínicas e escenográficas sorprendentes. Na actualidade Arturo Álvarez está a desenvolver novas formas de expresión, coa luz como fío condutor e como protagonista o ser humano e as súas relacións, coas súas luces e as súas sombras, encontros e desencontros. No últimos dez anos vén realizando unha labor exhaustiva de experimentación e investigación desenvolvendo os seus propios materiais que lle permitan maior liberdade creativa e expresividade. Crea e patenta SIMETECH® un material traslúcido que permite moldearse e conseguir texturas diversas. O seu compromiso coas novas xeracións de creadores lévao a convocar o Premio Arturo Álvarez de Xóvenes Talentos.